سوالف كَبل

سوالف كَبل 

عتبة جديدة

أول ما اشترينه قطعة الكاع ، شلنه هم ثكيل شراح يبني البيت شنحتاج شمنحتاج ، صفنه صفنه طويلة اخر شي كلنه نجيب ورقة وقلم ونسجل الخطوات وحده وحده ، كلنه نتبرك بطيبه زمان ونخطط على طريقتهم، اول اسم سجلناه (القنطرجي) أو مثل ما نسمي هسه الخلفه والي هو مسؤول على البنه والعمال،
أقلها ما نحير هو يجيب عمال (المرار) حتى يحضرون الكاع و(الهزاز) الي يشيل التراب ب (الهزه) على ظهره، وعمال الطين ذوله أهم شي عاد شغلتهم السطوح كل شي ولا يخرب السطح، النجار هم كون ما ننساه نروح نوصيه على جم تكمة، ومناك نمر على الجراخ اليمه عنده خوش (خرده كار) يشتغل الشغل الناعم كلش حلو، وال (الافرنجي) ماله هم يجنن وسوه خوش (موبليات)  لجيرانه.

الكاشي مخصوص نجيبه من كربلا، لازم نروح ل (عگد الجام) نمر على (الجامچي) و (أبو الچراچيب) ناخذ جم چرچوبه للـ (مري ) وصورنه ، وره منخلص من هاي السوالف الثگيلة نسويلنه مره على (سوگ الاطرقچية ) ناخذ للهول زوليه تبريز وللخطار وحده كاشان ، بس كون أنسق وياهن عنتكيات حلوه ، هذاك اليوم شفت خوش عنتكي بالسوگ ينراد نشوف شعده ما عده ، يحتاجلنه هم فرش جديده من الندّاف ، الخطار اليجونه خوما انيمهم على القديم .

با داده نسيت الاكل علنار بس لا احترگ أشم ريحة عطّاب ، اروح هسه اني، ومره الجايه أسولفلكم الفلاح شحيسوي بحديقتنه.

#شمم_بيرام