زعابيل

كاميرا فورية

البارحة دخلت لغرفة الزعابيل وگمت أنحبش بالغراض ، لكيت كاميرا فورية كلش قديمة ، هاي الكاميرا الها قصة طريفة ..

من جنت صغير .. أبويه قرر يشتري كاميرا ، گال : شنو بس اني من دون العالم ماعندي كاميرا ، لازم أشتري وحده !!

راح لباب الشرجي وإشترى كاميرا فورية ورجع للبيت فرحان بالكاميرا ، بس رأسا شالها وضمها بالكنتور !!

بقت أيام وشهور بالكنتور ، وأمي كل متگله طك صور للجهال يگلها : من أشتريلهم هدوم جديدة أطگلهم صور ، وبقى أبويه لا هو مشتريلنه هدوم جديده ولا هو طاگلنه صور بهدومنه العتيگة ..

آخر شي إقتنع يطگلنه صور ، طلع الكاميرا من الكنتور وطگلي صورة ، بس المشكلة كل ميطگلي صورة يطلع بس خشمي بالصورة ، خطيه يعيد المحاولة ويطگلي صورة ثانية هم يطلع بس خشمي بالصورة !!

أبويه كلش ضاج ، وگال : هاي الكاميرا أكيد خربانه لان تطلع بس الخشوم ..

عاد أبويه ثاني يوم أخذ الكاميرا للمصلح گله : هاي الكاميرا شلعت گلبي ، كل ما أطگ صورة لإبني يطلع بس خشمة بالصورة ، وگله : هاك شوف الصور اللي طگيتها طالع بيها بس خشم إبني ..

المصور أول مشاف الصور رأسا گام يضحك ، گله : حجي هذا مو خشم إبنك ، هذا خشمك أنت لان أنت تلزم الكاميرا بالمگلوب وتطگ صورة ويطلع بس خشمك ..

طبعا أكبر مصور بذاك الوكت مچان يلحگ أبويه بتصوير الخشوم .. فنان موبيده .




عماد والناس