أبو كفـــــشة عطال بطال ... ويريدك من الله تسأله فد سؤال
الحلقة - 4 -
(عبير العزاوي) سألت خوش سؤال:
اكثر مثل عراقي تردده
ج: المثل الي يكَول : اكل بصل وانسى
ما حصل
(حسام الخزاعي) كاتله الفضول :
ابو كفشة اموت واعرف الرقم الي بكفشتك مالمن
الجواب : وعليمن تموت !!! يمعود هذا رقم
الوصل مال قسط الثلاجة
(كاردينيا كاردينيا) تشتغل بجمعية رعاية النخيل:
ليش من تشوف النخلة تضوج
الجواب : اضووج !! واكو واحد يضوج من عمته
الغالية الي طالع عليهه فؤؤؤديتهه ام برحي
نجلاء حسين
شوكت يدك الجرس ويحل الامان بالعراق
الجواب : من يخلص الدرس الي ما اظنه يخلص
Wasam alaiz alaiz
شنو امنيتك بالحياة
الجواب : امممممم هنه هواي بس أهم امنية
انه من اكون بالفراش وجفوني قاربت على التعزيلة وبوكتته يكون ضوة الغرفة مشعول اتمنى
لو الله يحرك الكَلوب وانام قرقير العين
Shamam biram
شعورك من كصيت كفشتك
الجواب : اهئ اهئ اهئ مثل شعور واحد ميت
جوع ويصبوله برياني من هذا الي تردونه بخاطركم ويجي ويكلب الصينية على خاشوكة وميلكاهه
!! ، ولا تكولون شجاب الخاشوكَة على الكفشة على البرياني ، هيه هيج المعنى في بطن الحاجي
، صار عندي اختلاف بالسنتر وكمت امشي كاز مثل ابو الجنيب
Farah fulla
شوكت تمشط
الجواب : لا تعليق ، لأن لو خليت مشط على
راسي جان فقد ميزة كوني ابو كفشة
Hatem kareem
شنو رأيك بالمطربة احلام
الجواب : رأيي مطربة جميلة ولديها بعض الاغاني
الطاكَة والهه معجبيهه بس عن نفسي ، اكَول : لو تعتزل وتعزّل من وكَت احسن !! توفّر
النه ذنوب والله
Ghofran alhamad
شنو طموحك
الجواب : طموحي انه الكه اعرف الفرق بين
الكاسكيتة والشفقة والقبعة لأن ياهو اليشوفني يكول شوكت تلبس وحدة من هذن الفاتن فهذا
الطموح الذي هز مضجعي ( هلو يا مضجعي )
Yamani aliraqi
تعتقد الناس لازم تصير عدها كفشة مثلك احسن
الجواب : اكيد لا ، لأن متتخيلون مسؤولية
كونك عندك كفشة ، والتبعات الاجتماعية والاقتصادية والتجارية والهلة بشبشية المترتبة
عليها
مصطفى بهجت
شنو الفرق بين الشسوار والسشوار
الجواب : مثل الفرق بين البامية والبانية
، الأثنين .... عطلة الحلاقين فلا تروح تزين احسن
Maher aldulaimi
شنو كان حلمك ؟
الجواب : يا اخي دائما ما الحك على بدايته !! كل ما
انام الكه الحلم بادي ، بس أخر حلم جان اكشن ومن فزيت لكيت روحي متجقلب من فوق الجرباية
، منسدحاً على جانب الكومدي حاضن التيبلام وابجي ليش ما ادري 
ليست هناك تعليقات:
إرسال تعليق