بيت بيوت: زعابيل: القوطية

القوطيــــــة

عماد والناس

أيام گبل چنا نشرب مي بقواطي فافون , لان المي بيها يكون بارد وطيب ..

وچنا من ننام بالسطح ناخذ ويانه قواطي مي مثلجه نشرب بيها بالليل ..

بس جدي چانت عنده قوطية خاصه اله , يترسها مي ويصعد ويخليها يم راسه وميخلي واحد يشرب منها , يگول هاي مالتي ماأريد أحد يشرب منها ..

فد يوم نمنا بالسطح وأني گعدت نص الليل عطشان كلش ..

رحت على القواطي مال المي لگيتهن فارغات , باوعت شفت القوطيه مال جدي , گلت يله هسه هو نايم شمدريه خل أشرب منها ..

رحت عليها وقربعت المي البيها كله , لان چان بارد ويروي , والحلو بعده بيه ثلج لان أشرب والثلج يطخ بسنوني ..

شبعت كلش ورحت نمت بفراشي ,

صار الصبح جدي شاف قوطيته فارغه گام يصيح !!

گال : ولكم منو شارب المي من قوطيتي , وين أضمها منكم بعد !!

أبويه گله : يله ميخالف هسه قحط مي , هسه نترسلكياها ..

گال : ولكم أني مو على المي , بس هاي القوطية أنگع بيها سنوني التركيب , الدكتور گلي خليها بالمي للصبح حتى لاتيبس ..

طلع جدي ميشرب مي بهاي القوطيه , بس خالها ينگع بيها سنونه ..

وأني أكووول شلون الثلج باقي للصبح وممايع , طلع هذا مو ثلج هاي سنون جدي تطخ بسنوني ..

الله يرحمك يا جدي , متت صارلك سنين بس طعم سنونك لهسه بعده بحلگي