أبـــــو كفشـــــــة

أبو كفـــــشة عطال بطال ... ويريدك من الله تسأله فد سؤال

 الحلقة ( 2 )

(نور جمال عبد الحميد) سألت أبو كفشه فد سؤال ناشينال جيوكرافيكي:

س/ منو اسرع النمر لو الزرافه اطول

ومنو اسمن الفيل لو النعامة انعم ؟

ج/ اعتقد القرد رشيق جدا وهذا لا يمنع ان الفيل له خرطوم يساعده على شرب عصير الليمون.

(ذو الفقار البياتي) مهتم جدا بموضوع الرشاقة و كان سؤاله:

س/ شنو تريكت !! وشلون محافظ على رشاقتك؟؟

ج/ تريكت باجلة - بالجيم - وفوكاها بيضة

اما بالنسبة للرشاقة ..

اذا تريد تخسر نص كيلو في غضون

 أسبوع يمكن سحق راس البصل

وخلطه بمي البلبي ودهن البريك الخالص - وتطبيق هذه الخلطه وتمريرها عالكرش

مع ضربات لطيفه مصحوبة بأغنية سرمد مات ادوك عالكوله

 حزورة مدري نكتة من صديقنا (Sarhang Kazim) تكول :

س/ فد يوم 3 بزازين ديعوعون علة فيل ديمشي ع الحايط

بصفهم كنغر ديطير ركض بلمي ..السؤال:ماهو النبات المفقود

ج/ ومدري حنش خمش خشم خميس مدري خميس خمش خشم حمد .. الاهل شلونهم ؟

(سلطان السامرائي) حب يسأل سؤال جداً ذو قضية:

س/سؤالين طائفيين

1-انته صاصي لو عمباوي ؟

2-انته مدريدي لو برشلوني؟

ج/1- اني مايونيزي وكجباوي وبعيد كل البعد عن فلاح ابو العمبة

2-اني مدريـ شلوني - واشجع حسين الجسمي في اغنية -حبيبي بنطروني-

(مينا الجي به جي) يبدو انها نصيرة البيئة:

س/ ليش متستعمل النفاضة .. يمدحوها ترة!

ج/ النفاظة استعملها من واحد يسألني سؤال وما اعرف اجاوب عليه ..

(صفا وليد) فنانة و مهتمة بالتكنلوجيا .. خل نشوف شجاوبها ابو كفشة على سؤالها:

س/ شنو رأيك بقلم ثري دي الي سوة ضجه ؟

ج / لا فرق بينه وبين الفلم الثري دي - غير بس نقطة وحدة فوك الفاء

(أحمد عبد الأمير) اللي يمكن هو وكيل دابر املا يسال أبو كفشة سؤال:

س/لنفرض صحيت الصبح من النوم وباوعت بالمراية وملگيت شعرك يعني نمره ٤ شلون راح يكون شعورك مع ذكر التفاصيل؟

ج/يمكن افقد التوازن و يطفر عندي مركز الثقل واتدهدة ليورة

لو اكوم امشي صفح مثل ابو الجنيب و اطلع للشارع

ويضيع مني باب الحوش وبعد ما اعرف وجوه اخوتي ..

وامي تخابر علية الاسعاف .

لوتنزل الحرارة و استبرد وتطكني الفلاونزا

واخلصها ابرتين خبط لحد ما يتزرف .. كلبي من القهر

لو اطلع كللش حلو وتشتغل اللايكات علية من كافة الاقطار وانترس معجبات ورسائل عالخاص

و يسويهه المصخم حظي واصفطهن مثنى وثلاث وحدة للغدة وحدة للعشة وحدة تكش الذبان هههه

(أشرف حسو) مشغول البال بشأن نوعية السمسم اللي يستخدموه بالراشي فيكول:

س/نكدر نعرف سر نجاح معملكم مال الراشي ؟

وشنو تفضل الراشي ويا الدبس لو وحده ويا جاي حلو وحار ؟؟؟

الراشي يرهم العصر لو لا؟؟ من تتعشى راشي وجاي تكدر تتريك بيض وجبن ؟

ج/  اعتذر عن الاجابة عن هذا السؤال لان الراشي والمرتشي بالنار ههههه

(علي الزوبعي) مشبعان نوم فسأل ابو كفشة:

س/ الي يريد ينام سبوع شيسوي!؟

ج/ يتحارش بهذا ..

صديقتنا (million_roses_k) متابعة فعالة على الانستغرام واكيد تريد تشوف ابو كفشة شنو رأيه:

س/ابو كفشة شنو اكثر حساب يعجبك عالانستكرام وهل تعتقد بأن التكنلوجيا

جمعت الناس ام فرقتهم ؟

ج/ اكثر حساب يعجبني بالانستكرام هو (Entomologist)

وخاصة من يحجي عن البك الافريقي

اما الذي اعرفه عن التكنلوجيا ..

فما فعلته هي قد جعلتنا قليلين الاستحمام وخربت علاقتنا بالصابون السائل

هذا سؤال خطير من صديقتنا (sososara95)..بس ابو كفشة ولاااااايمه :

س/ منو اكثر شخصية تحبها بمجلة بيت بيوت ؟

ج/ احب نفسي بصراحه والباقين كلهم اكرهم ههههه بدون سبب.

--------------------------------------------------------------------------------------------------------------------

الحلقة -1-

س/ سرى الغزالي : شنو تشوف لون الفستان ازرك واسود لو ابيض وذهبي 

ج/ اني اشوف لو متلبسي من تطلعين هواي احسن 

س/ علي بيو : هل تحب لقب الكفشة ؟

ج / هذا مو لقب هذا اسمي الثلاثي

س/ حيدر الخفاجي : اريد حل لتساقط الشعر ؟

ج/اولا تغسل  الشعر بالماء الفاتر وتضع نسبة كافيه للشعر من هذا المنتج الفعال ..

 

 وتلبس شفقة وتعوفها 8 ساعات براسك . والنتيجة مجربة

 س/ الزهرة النرجسية: ما سر وضع الجكارة في الرأس ؟

 ج/ لان المخدة محشوة كطوف بدل الكطن

 س/ : بيا شامبو تغسل Angelic Shades؟

ج/ من يوم اختفاء صابون الحصة لليوم ماغاسل شعري

س/ مصطفى بهجت : لماذا نستخدم كلمة ضلع للشخص الي نحبه دون غيرها من

 الكلمات ؟

ج/ اولا لان كلمة - عيني - صارت قديمة - ثانيا الضلع اذا انكسر يكلف فوك

  ال500$ حتى يتجبر .. اضف الى ذلك ان الضلع وضيفه حماية القلب يعني بين قوسين سكيورتي .. يعني حارس بالعنقروزو .

اذن .. لو تسمي الي تحبه حارس وتختصرها يكون افضل

س/ سلطان السامرائي  : جنت تتوقع قصيدة ناعم ياذيل البزونة راح تصير نشيد بدل بلي يبلبول ؟

ج / اذا نرجع للصراحه  جنت اتوقع انها راح تاخذ حيز كبير في قلوب السامعين

  لكونها كتبت في مكان هادئ جدا ولكن لم اتوقع بأنها ستضارع اغنية بلي يبلبول التاريخيه .. وسأرفقها في اولى صفحات ديوان قفشة وكفشة بالمستقبل