زعابيــل .. عربانة أم البولبرن

عربانة أم البولبرن

هي وحده من العاب الطفولة اللي أبد متنسي واللي إستمتعنا وتسلينا وفرحنا بيها هوايه بأيام طفولتنه ..

هاي اللعبه مچانت تحتاج إمكانيه وفلوس ، وچان أي طفل يگدر يصنعها بنفسه ويلعب بيها ويستمتع ويقضي أحلى الأوقات ويه أصدقائه من أهل المنطقة ..

من چنت صغير .. چنت كلش أحب هاي اللعبة ، بس المشكلة مچان عندي وحده منها ، وبيوم من الأيام قررت أمتلك من هاي العربانة حتى يتساوى راسي ويه راس زعاطيط المنطقة ..

بوكتها جبت خشباتي وبساميري وبولبرناتي وبديت أصنع هذا الإختراع العجيب ، اللي كل الجهال چانوا يستمتعون ويضحكون ويفرحون من يلعبون بيه ..

صنعت هاي العربانة وكملتها وردت أنزلها للشارع حتى العب بيها وأستمتع ، بس بالصدفة وقبل لا أطلع من البيت شافني أبويه ..

أول مشافني وشاف العربانة بأيدي ، چان رأسا يصيح عليه ، گال : إبني شنو هايه اللي بيدك ؟

گتله : يابه هاي عربانة العب بيها بالشارع ويه الجهال ..

گال : بله متستحي على نفسك ، شكبرك تصير بعد وتلعب بعربانة حالك حال الزعاطيط ، لك إبني أنت كبرت واني داأدورلك على مره ، شنو تريد تلعب بالشارع بعربانه ، لك شتگول عليك الناس ؟

اني بوكتها إقتنعت بكلام أبويه ، وگلت : صدگ اني كبرت وبعد مو مال العب بعربانة بالشارع ، ورأسا رجعتها للبيت ..

وراها بيومين چنت راجع من المدرسة دخلت للبيت ، چان الگه أبويه صاعد بالعربانة ويفتر بيها بالهول !!

گتله : هااااا يابه لعد شلون تگلي أنت كبرت وميصير تلعب بالعربانة بالشارع ، لعد أشو أنت گاعد تلعب بيها ..

گال : لك لتصير غبي ، اني گتلك لتلعب بالشارع مو بالهول ، تعال تعال أدفعني لان أمك انشلع گلبها اليوم وكلش تعبت ، لأن من الصبح لهسه تدفع بيه .

( عماد والناس )