العصرونية

قصة الخنفسانة

نور القيسي

العصرونية وي الحجية ما تكمل الا بسالفة من سالوفات اهلنا، وطبعا هالسالفة ما تجي عبث ابداً،  لازم تجيبها الحجية بالمكان يعني الها مناسبة وبما انو اكو وحدة من حديثات المنطقة كلما تجي قسمة للباب ترفضها سولفتنا الحجية هالسالفة.
كان ياما كان في قديم الزمان چانت اكو خنفسانة خنفسانة مخططانة محمرانة كاعدة ابباب الحويشانة، لابسة حجل و تريد من ربهه رجل.
فات من يمهه ابو الفجل  كاللها: خنفسانة مخططانة محمرانة كاعدة ابباب الحويشانة، لابسة حجل و تريد من ربهه رجل، تتزوجيني؟ كالتله: اذا تزوجتك و زعلت علي بيش تضربني؟ كاللهه: أضربج باصغر فجلاية عندي. كالتله: عوع عوع قشغ بصل ما احملو ولي ما اتزوجك٠
وبعد شوي مر من يمهها ابو الحصان
_ و كاللهها: خنفسانة مخططانة محمرانة كاعدة ابباب الحويشانة، لابسة حجل و تريد من ربهه رجل، تتزوجيني؟
- اذا تزوجتك و زعلت علي بيش تضربني؟ كاللهه: أضربج بالقمچي
. كالتله:  عوع عوع قشغ  البصل  ما أحملو ولي ما اتزوجك٠
لهناك و مر من يمهه مختار الطرف، لهناك ومر من يمها خنفسانة مخططانة محمرانة كاعدة ابباب الحويشانة، لابسة حجل و تريد من ربهه رجل، تتزوجيني؟
-: اذا تزوجتك و زعلت علييًٓ بيش تضربني؟ كاللهه: أضربج بحزامي. كالتله: عوع عوع قشغ البصل ما أحملو ولي ما اتزوجك.
وبعد شوي فات من يمها شيخ الشط خنفسانة مخططانة مكحلانة محمرانة كاعدة بباب الحويشانة لابسة حجل وتريد من ربها رجل تتزوجيني ؟
كالتله: اذا تزوجتك وزعلتك بيش تضربني
گاللها: اضربج براحة ايدي على كيفي
كالتله: عوع عوع قشغ بصل ما احملو ولي ما اتزوجك
وقبل ما يصير الغروب، مر من يمها شيخ الجردان
كاللها: خنفسانة محمرانة مخططانة گاعدة بباب الحويشانة لابسة حجل وتريد من ربها رجل تتزوجيني؟
كالتله: اذا تزوجتك وزعلتك بيش تضربني
كاللها اضربج بطاااااااااااارف ذويلي
كالتله صدقة لله شگد حلو انت٠
وتزوجت خنفسانة مخططانة محمرانة كاعدة بباب الحويشانة لابسة حجل وربها نطاها رجل، ومرت الايام واشتهت دبس، راح شيخ الجردان يهف  للسوگ وگبل على بساتيگ الدبس، مد ايده يغرف دبس مينوش، مد رجله هم مينوش، مد ذيله وضاگ الدبس كلش حلو ولهناك اتشنگل (اتعلگ بالمگلوبي) ديغرف دبس وچان يوگع بالبستوگة والتمو العالم لگو مطوف وصل الخبر لخنفسانة مخططانة مكحلانة گاعدة بباب الحويشانة
گالولها مات شيخ الجردان
گامت تبچي وتلطم وتصيح مات
بزوني والكحلة بعيوني
مات شيخ الجردان ومطوف چنه مخطان٠
مات شيخ الجردان وبقت خنفسانة ارملة تندب وتنعي حظها، مراح نگول عاشو عيشة سعيدة لان شبعد يبقه من ام البيت يروح رجلها من ايديها، بس حنگول لو چان بيتنا گريب اجيبلكم طبگ حمص وطبگ زبيب٠
*حكاية بغدادية قديمة  كانت تروى على لسان الجدات، بدوري نقلتها كما سمعتها من جدتي، ربما تتغير الاحداث حسب الراوي من مدينة لاخرى