الصندقچـة

الصورة لـ: محمد زنكنة

قصة الصندقچـة ..

بقلم .. عماد والناس

بيبيتي الله يرحمها ويرحم والديكم , چانت عدها صندقچة كلش قديمة , وچانت تخلي بيها كل ممتلكاتها , وچانت قافلتها وشاده المفتاح بخيط ومعلگته برگبتها وشحده اليوصل يم صندقچتها , تشرب من دمه ..

خطيه من رادت تموت وصت أبويه گلتله : كل ممتلكاتي البصندقچة تنطيهن لخواتك بالتساوي , لا تفضل وحده على وحده , وتلگه جزدان بالصندقچة هذا أخذه الك لان آني عايشه عندك كل هاي السنين وأنت تعبت ويايه هوايه وصرفت عليه وداريتني فالجزدان والبيه كله الك حلال عليك ..

أبويه خطيه گلها : يمه هسه يا جزدان يافلوس , أهم شي سلامتچ والله يطول بعمرچ , بس هو بداخله مكيف بالجزدان ويهز رگبه بگلبه ..

بعدين بيبيتي سلمت الأمانة وماتت , تجمعوا أبويه وعماتي وفتحوا الصندقچة لگو بيها خاشوگتين وسچينه وماعون مال چاي , أبويه رأسا ً گام يضحك على عماتي وگلهن يله كل وحده خل تاخذ خاشوگه وتروح لبيتها وخمط هو الجزدان وإنهزم بيه وگال : هذا اليه أمي حبيبتي گلتلي أخذه الك ومكيف ويضحك ..

بعدين فتح الجزدان لگه بيه ورقة مكتوب بيها .. إنطي لعبد الله أبو الصيدلية ٣٠٠ الف , لان چنت أخذ منه دوا مال ضغط بالدين , أبويه من قرأ الورقة رأساً صعد عنده الضغط ومات ..

خطيه أبويه عاش طول عمره متأمل يحصل شي من هل صندقچة , تاليها طلع هو المطلوب للصندقچة.

الصندقچة
تصوير: محمد زنكنة