بيت بيوت: جدريّـه: شيخ محشي

جدرية

شيخ محشي

شلونكم يا جماعة

خالتكم ام فلان مالها خلك هاليومين تدرون ربيع والجو مخربط ساعه برد ساعه حر

وكضتها بين الاطباء وصوتها مبحوح كوة طالع ما راح تكدر تحجي وياكم هواي

المهم يا بعد عيني اليوم سويتلكم شي خفيف ان شاء الله يعجبكم

جدرية

محشي كوسا باللحم

المقادير:

ربع كيلو لحم

كيلو كوسا متوسطة الحجم

باقة كرفس

بصلة متوسطة الحجم

2 طماطة

4 ملاعق اكل معجون طماطة

بهارات ( كاري ، كركم ، ملح )

الطريقة:

يشوح اللحم بالزيت بعدها يضاف له البصل المثروم ثرم ناعم بعدها الطماطة المثرومة ثرم ناعم وبعد ما يذبلن ينضاف الكرفس المثروم والبهار حسب الرغبة

بالنسبة للكوسا تشريحها للمنتصف طوليلا بحز السكين من ثم تحميرها بالزيت

يتم حشو الكوسا بالخليط ورصه في القدر والحشو المتبقى يتم اضافته ايضا للقدر فوق الكوسا

يخلط المعجون مع كمية مناسبة من الماء بحيث يطفو فوق الكوسا بمقدار اصبعين

يوضع القدر على النار ويهدر بعد ان يغلي لعشر دقائق

يقدم مع تمن العنبر والف عافية

______________________________________

القيمــة

مساكم الله بالخير يا اهلنا الطيبين

شلونكم شخباركم ان شاء الله عجبتكم اطباق عزيمة ام علان ... جان مكانكم خالي واشتهيناكم ويانة..

المهم طبقنا اليوم مميز وهو القيمة العراقية والي تعد وحدة من اهم الاطباق الموروثة شعبيا

اسمها دلالة على قيمتها الغذائية نسبة لمكوناتها الاساسية واللي هي اللحم والحمص

واكيد من المعروف ان القيمة من الوجبات الرئيسية اللي تتقدم في المناسبات في جنوب العراق

بالعادة اعداد القيمة يتطلب ساعات طويلة طبعا نظرا لانها بالعادة تنطبخ بكميات جبيرة

اليوم راح اعلمكم تطبخوها بكمية قليلة ومتستغرق وقت طويل

جدرية القيمة العراقية :

المقادير:

لـ 3 اشخاص

2 كوب حمص مسلوق

لحم شرح بنفس المقدار

1 بصلة كبيرة

4 ملاعق معجون طماطة

ملعقة صغيرة هيل مطحون

ملعقة صغيرة دارسين

ملعقة كبيرة كمون

1 ملعقة كبيرة نومي بصرة مطحون

طريقة العمل :

1- سلك الحمص واللحم بحيث الكميات متساوية

المهم بعد ما ينسلكن زين تصفيهن واحتفظي بالمي

2- بعدها تدكيهم بحيث اللحم والحمص ينهرس

3- البصلة تنثرم ناعم كلش واحمسوها بالزيت اوالدهن

4- ضيفو المعجون

ورة ما يحمس شوية المعجون ضيفي مي السلك

5- بعد ما يفور ضيفي الحمص واللحم

وضيفي البهار

ولتنسون الملح وهذا حسب تذوقكم

وتركوا يتهدر بعدين

*********************************************************************

* أطباق اليوم من اعداد رسل النعيمي

مساكم الله بالخير يا اهلنا الطيبين

اليوم عددنا مميز لان بي عزومة وشكد حلو احساس واحد يروح معزوم ياكل وبس هههه

العزيمة كانت عند صديقتي الملقبة بأم علان

شلون بيكم مو كتلكم لتسالون على فلان وهمين ارجع اكوللكم لتسالون على علان

ولان بعيد الام محد ذكرنه قررنة اني و ام علان نحتفل بي على طريقتنا الخاصة

المهم يا خالة رحت وجان اشوفلكم ذيج الشوفة

شلون سفرة وشون ملكة كضيناها سوالف وتذكرنا ايام الخير

طبعا ام علان ماقصرت سوتلنة اكل مال فرنجة مثل متكول

صايرة تستخدم هذا اليسموه انترنيت من وراية وتطلع وصفات

بيني وبينكم اني هم قررت اتعلم قابل وحد ام علان

ها ترة مو غيرة لا تحسبوها غير شي

المهم هسة اعوفكم وية الصور والوصفات واتفرجوا على كيفكم

والف عافية ومو تنسون من تطبقون تدزولنة الصور

جدرية:

Burger

بركر اللحم مع المشروم والبصل واللحم المقدد

الحشوة:

1- 400 غرا لحم بقر صافي مثروم + 200 غرا غنم مثروم

2- 3 ملاعق خردل

3- 3 ملاعق كتشب

4- بصله وسط مثرومة ناعم جدا

5- فصين ثوم

6- صفار بيضة

7- رشة فلفل اسود

الطريقة:

نخلط الحشو جيدا ونقسمه كرات مع الضغط عليها بدون تكرار ونصفها على الكريل الحامي كما هو موضح في الصورة مع مراقبتها وتقليبها .

نقلي اللحم المقدد بالزبدة

نشوح المشروم مع البصل

نجمع مكونات لفة البركر نرص المواد فوق بعضها كما هو موضح بالصورة مع الكتشب والمايونيز واي صوص اخر تحبونه

ورح نسوي نوعين بلبركر الكلاسيك و بالمشروم

المقبلات:

سلطة الحديقة

اوراق سبانخ مع خس مع قطع ميني طماطم وزيتون والصوص زيت زيتون وحامض وصلصة سيزر جاهزة

بطاطا ودجز:

بطاطا صغيرة واوراق زعتر وروز ماري وفلفل اسود فريش وملح خشن ممكن اضافة جبن بارميزان مبروش بعد نضج البطاطا

تصف البطاطا بعد التتبيل وتوضع في الفرن نص ساعه بعد دهنها بزيت الزيتون او الزبدة على درجة حرارة 180

*********************************************************************************

شلونكم حبايب .. بداية احب اوجه تحية لكل اللي راسلوني سواء على صفحتي الشخصية او شرفونا بتعليقاتهم بكروب المجلة على الفيس بوك طبعا ما اعرف شون اشكركم على كلماتكم الحلوة وارائكم بفقرة ام فلان بالعدد الاول من مجلة بيت بيوت

كلش سعيدة الاطباق والمعلومات عجبتكم .. وهذا اكيد يشجعني استمر وبقوة اكبر ..

هسة خلصت الرسميات خلينة نبدي بأسم الله

اليوم طبقنة اختياره بي قصة خل احجيلكم السالوفة ..

احد الاصدقاء بالتعليقات على ام فلان طلب المسموطة .. طبعا ام فلان للاسف ما عرفت شنو المسموطة بس تلقت دعم سريع من صديقة وردت حتى تنطيها معلومات عن المسموطة

المسموطة تشريب سمك وغالبا ما يكون السمك مجفف بالملح و يسموه (الگباب) ويقال اكو بعض الناس اول يوم بعيد الفطر يتريگون مسموطة يگولون تعود المعدة على الاكل باعتبار جانوا صيّام.

طبعا ام فلان حاصت ولاصت شنو سمج مجفف هاي منين نجيبه ؟

ومن جديد سعفتني صديقتي العزيزة بالاجابة عن طريقة تجفيف السمج حتى اكدر اسوي المسموطة ..

تنظفوها و تملحوها قوي حتى لا تخرب وتشروها عالحبل جديات ترى قبل جانوا البحارة يجففون بالرمل دفن يعني.. وعموما ممكن تسووها بسمج الحمام او التونة الموجود بالاسواق بس مجمد مو مجفف وخلي وياها نومي بصرة و بصل و ثوم ,وكركم و هالسوالف (وألبي عندكو يخواتي حتاكلوا صوابعكم وراها )

بيني وبينكم الحجي السالفة صعبة وام فلان المكرودة مو مال تجفف سمج بهالشتا لذا قررت اسويلكم اكله جنوبية اخرى مقاربة للمسموطة واسمها " صيد الجدر" سهلة وسريعة وبسيطة وبيني وبينكم اني كلش احبها مو بس لاني من عشتاق السمج لكن لان هي فعلا شهية وطيبة

مادوخكم وياي .. هاي الوصفة والطريقة والف عافيات

المقادير:

سمج اي نوعه
بصل مكعبات
فلفل شرائح
ثوم مثروم
معجون طماطة
ملح + بهارات ( كاري - نومي بصرة )

الطريقة:

نشوح قطع البصل بالزيت

بعدين نضيف الثوم والفلفل ونتركه على نار هادئه حتى يذبل

نغسل السمك ونقطعه قطع مناسبه

ونحمره بالزيت مع البصل والثوم والفلفل من كل الجهات

ثم نضيف البهار ومعجون الطماطة

نضيف مي حسب الرغبة ومن يغلي نتركه يتهدر

طبعا يتقدم وية البصل الاخضر والخبز العراقي او التمن العنبر

والف عافية :)

******************************************************

فسنجون

طبقنة اليوم اسمه غريب ومو الكل يعرفوه .. اكلة جنوبية اصلها من بلاد فارسعادة يطبخوها النجفيين مع اي نوع من انواع الطيور .. مثل متعرفون الطيور تكثر ببحر النجف لكن حاليا تنطبخ وية الدجاج او البط جربوها طعمها طيب واكيييييييد راح يعجبكم ماطول عليكم بالسالفة هاي المقادير والطريقة وصور الطبق

المقادير: